തിരുവനന്തപുരം: കേരള ക്രിക്കറ്റ് ലീഗില്‍ പോര് മുറുകുമ്പോള്‍ സോഷ്യല്‍ മീഡിയയിലും ടീമുകള്‍ ഏറ്റുമുട്ടുകയാണ്. കൊച്ചി ബ്ലൂ ടൈഗേഴ്‌സും കാലിക്കറ്റ് ഗ്ലോബ്സ്റ്റാര്‍സും തമ്മിലുള്ള മത്സരമാണ് സോഷ്യല്‍ മീഡിയയില്‍ തരംഗമായത്.
ബുധനാഴ്ച നടന്ന മത്സരത്തിനു മുമ്പ് ഗ്ലോബ്സ്റ്റാര്‍സിനെ കളിയാക്കും വിധം കൊച്ചി ടീം തങ്ങളുടെ ഒഫീഷ്യല്‍ പേജില്‍ ടുഡെയ്‌സ് ലഞ്ച് കോഴിക്കോടന്‍ ബിരിയാണി എന്ന കാര്‍ഡ് പോസ്റ്റ് ചെയ്തു. എന്നാല്‍ കളിക്കളത്തിലായിരുന്നു ഗ്ലോബ്സ്റ്റാര്‍സിന്റെ മറുപടി. 39 റണ്‍സിന്റെ ആധികാരിക ജയം.
പിന്നീട് കളി സോഷ്യല്‍ മീഡിയയിലായിരുന്നു. ജയത്തിനു പിന്നാലെ കാലിക്കറ്റിന്റെ മറുപടി വന്നു. കൊച്ചിക്കെതിരേ 39 പന്തില്‍ 57 റണ്‍സടിച്ച് കളിയിലെ താരമായ എം. അജ്‌നാസിന്റെ ചിത്രം പോസ്റ്റ് ചെയ്ത് ‘ആളറിഞ്ഞു കളിക്കടാ!’ എന്നായിരുന്നു ഗ്ലോബ്സ്റ്റാര്‍സ് കുറിച്ചത്. ഇതിനു താഴെ ആരാധകരും പരസ്പരം പേരടിക്കുന്നതും കാണാം.
