പത്തനംതിട്ട: ഹാജരായ ദിവസം എന്തുജോലിയാണ് ചെയ്തതെന്ന് രേഖപ്പെടുത്തിയില്ലെങ്കിൽ, പിറ്റേന്ന് ഹാജർ കിട്ടാത്ത സംവിധാനം ബി.എസ്.എൻ.എലിൽ വരുന്നു. കമ്പനിയുടെ കാര്യക്ഷമത കൂട്ടുന്നതിനായി നടപ്പാക്കുന്നതാണിത്.ചെയർമാൻമുതൽ താഴെവരെയുള്ള ജീവനക്കാർക്ക് ബാധകമാകുന്ന ഈ സംവിധാനം നടപ്പാക്കുന്നത് പീപ്പിൾ അനലറ്റിക്സ് എന്ന മൊബൈൽ ആപ്പുവഴിയാണ്. ആപ്പിന്റെ പ്രവർത്തനം തുടങ്ങി. പിറ്റേന്നത്തെ ഹാജർ അനുവദിക്കുന്നതിന് തലേന്നത്തെ ജോലിവിവരങ്ങൾ രേഖപ്പെടുത്തണമെന്ന വ്യവസ്ഥ പിന്നാലെ തുടങ്ങുമെന്നാണ് അറിയിച്ചിരിക്കുന്നത്.
ജീവനക്കാരുടെ ചുമതലബോധം ഉറപ്പിക്കുന്നതിന് 2022-ൽ ടെലികോം മന്ത്രാലയവും ബി.എസ്.എൻ.എലും തമ്മിലുണ്ടാക്കിയ ധാരണപത്രത്തിന്റെ അടിസ്ഥാനത്തിലുള്ള നടപടികളാണ് മൊബൈൽ ആപ്പിലെ ഹാജർ. അന്നത്തെ കേന്ദ്രമന്ത്രിസഭയുടെ തീരുമാനപ്രകാരമായിരുന്നു ഇത്.ഹാജർ രേഖപ്പെടുത്താനായി ‘മൈ ഓഫീസ്’ എന്ന മൊബൈൽ ആപ്ലിക്കേഷൻ കേരള സർക്കിളിൽ തിരുവനന്തപുരത്തെ ഐ.ടി. ടീം തയ്യാറാക്കിയിരുന്നു.
അത് ദേശീയതലത്തിൽ ഔദ്യോഗികമായി സ്വീകരിച്ചു. ജീവനക്കാർക്ക് പ്രത്യേക ലോഗിൻ ഐ.ഡി.യും പാസ്‌വേഡും നൽകിയിരുന്നു. അതിൽ ഹാജർ രേഖപ്പെടുത്തുന്ന സംവിധാനം കുറെനാളായി ഉണ്ട്. ഈ മൊബൈൽ ആപ്പിനെ, കമ്പനിയുടെ എന്റർപ്രൈസ് റിസോഴ്‌സ് പ്ലാനിങ്ങുമായി (ഇ.ആർ.പി.) ബന്ധിപ്പിച്ചു.
ഹാജർ ആപ്പ് വികസിപ്പിച്ചാണ് പീപ്പിൾ അനലിറ്റിക്സ് ആപ്പ് നിർമിച്ചത്. കമ്പനിയുടെ മൊത്തം പ്രവർത്തനങ്ങളുടെ പോർട്ടലായ ‘സാപു’മായി ബന്ധിപ്പിച്ചതിനാലാണ് പ്രതിദിനജോലിയുടെ വിവരങ്ങൾക്കൂടി അപ്‌ലോഡ് ചെയ്യാൻ കഴിയുന്നത്.
ഓരോ വിഭാഗത്തിലെയും ജീവനക്കാർക്ക് നിശ്ചയിച്ച ജോലിയിൽ ദിവസവും ചെയ്യുന്നവയുടെ വിവരങ്ങൾ 100 വാക്കിൽ കൂടാതെ ആപ്പിൽ രേഖപ്പെടുത്തണം. ‘ഡെയ്‌ലി ഡയറി’ എന്നാണ് ഇതിന്റെ പേര്. രേഖപ്പെടുത്തുന്ന ജോലിയുടെ വിവരങ്ങൾ തൊട്ടുമേലെയുള്ള ഉദ്യോഗസ്ഥൻമുതൽ ചെയർമാൻവരെയുള്ളവർക്ക് കാണാം.മേലുദ്യോഗസ്ഥർക്ക് ഫീഡ്ബാക്ക് നൽകാനുള്ള സംവിധാനവും ആപ്പിലുണ്ട്. മികച്ച പ്രവർത്തനത്തിന് ജീവനക്കാർക്ക് പുരസ്കാരങ്ങളും നൽകും.
ചെയർമാൻ ആൻഡ് മാനേജിങ് ഡയറക്ടറുടെ സ്വർണമെഡലാണ് ദേശീയതലത്തിൽ നൽകുക. എല്ലാ വർഷവും ഏപ്രിലിൽ കമ്പനിയുടെ നേട്ടങ്ങൾ, മികച്ച ജീവനക്കാരെ പരിചയപ്പെടുത്തൽ എന്നിവ ഉൾപ്പെടുത്തി ‘അത്യുത്തം’ എന്നപേരിൽ പ്രസിദ്ധീകരണവും ഇറക്കും.
