ചെര്പ്പുളശ്ശേരി(പാലക്കാട്): എക്സൈസ് സംഘത്തെ കണ്ട് ഭയന്ന് പുഴയില് ചാടിയ 17-കാരന്റെ മൃതദേഹം കിട്ടി. വല്ലപ്പുഴ സ്വദേശി കളത്തില് ഷംസുവിന്റെ മകന് സുഹൈറിന്റെ മൃതദേഹമാണ് തൂതപ്പുഴയില്നിന്ന് കണ്ടെത്തിയത്. ഞായറാഴ്ച രാവിലെ ചുണ്ടമ്പറ്റ നാട്യമംഗലം ഭാഗത്തുനിന്നാണ് മൃതദേഹം കിട്ടിയത്.
വെള്ളിയാഴ്ച വൈകീട്ടാണ് കുലുക്കല്ലൂര് ആനക്കല് നരിമടയ്ക്ക് സമീപത്തുവെച്ച് സുഹൈര് പുഴയില് ചാടിയത്. എക്സൈസ് സംഘത്തിന്റെ വരവറിഞ്ഞ് ചിതറിയോടിയ സംഘത്തിലുണ്ടായിരുന്ന ഇയാള് പുഴയില് ചാടിയിരുന്നെന്ന സുഹൃത്തിന്റെ മൊഴിയുടെ അടിസ്ഥാനത്തിലാണ് തിരച്ചില് നടത്തിയത്.
വീട്ടുകാരുടെ പരാതിയെത്തുടര്ന്ന് പട്ടാമ്പി അഗ്നിരക്ഷാസേനയും പാലക്കാട്ടുനിന്നുള്ള അഗ്നിരക്ഷാസേനയുടെ മുങ്ങല്വിദഗ്ധരും ശനിയാഴ്ച രാവിലെ 7.30 മുതല് വൈകീട്ട് 5.30 വരെ പുഴയില് തിരച്ചില് നടത്തിയെങ്കിലും സുഹൈറിനെ കണ്ടെത്താനായിരുന്നില്ല. പുഴയില് തണുപ്പുകൂടിയതിനാല് ശനിയാഴ്ച വൈകീട്ടോടെ തിരച്ചില് നിര്ത്തിയിരുന്നു. തുടര്ന്ന് ഞായറാഴ്ച രാവിലെയാണ് മൃതദേഹം കിട്ടിയത്.
വെള്ളിയാഴ്ച വൈകീട്ട് സുഹൈര് ഉള്പ്പെടെ എട്ടുപേര് ആനക്കല് നരിമട ഭാഗത്ത് നില്ക്കുകയായിരുന്നു. ഇതിനിടെ, പട്ടാമ്പി റേഞ്ച് എക്സൈസ് സംഘം പട്രോളിങ്ങിനെത്തിയിരുന്നു. ഇതുകണ്ട് ഇവര് ചിതറിയോടി. ഇവരില് നാലുപേര്ക്കെതിരേ എക്സൈസ് കേസെടുത്തു. ഇതിനിടെ, പുഴയില് ചാടി നീന്തിയെത്തിയ യുവാവാണ് സുഹൃത്തായ സുഹൈര് പുഴയില് ചാടിയിരുന്നെന്ന് രാത്രി 10 മണിയോടെ വീട്ടുകാരെ അറിയിച്ചത്. ശനിയാഴ്ച രാവിലെയും കണ്ടെത്താന് കഴിയാത്തതിനെത്തുടര്ന്ന് വീട്ടുകാര് ചെര്പ്പുളശ്ശേരി പോലീസില് പരാതി നല്കുകയായിരുന്നു.